қайта қарулану

(Перевооружение)

әскерлерді (күштерді) жаңа, жетілген әскери техникамен жабдықтау. Қ. қ. процесі ғылым мен техниканың даму деңгейімен, мемлекеттің өндіріс ахуалымен және экономикалық мүмкіндіктерімен, сонымен қатар қарулы күрес жүргізу тәсілдерінің өзгеруімен тікелей байланысты. Қаруды толық ауыстыру циклы үздіксіз қысқартылуда. Егер ХХ ғасырдың басында қарудың жаңа үлгісін жасау және онымен әскерді жабдықтау үшін 20—30 жыл қажет болса, қазіргі жағдайда бұл процесс бар-жоғы 10 жылды қамтиды. Қару мен әскери техниканың әрбір жаңа буыны техникалық тұрғыдан күрделіленіп, ғылыми-зерттеу, тәжірибелік-конструкторлық жұмыстар көлемі артқан сайын материалдық шығындарды соғұрлым көп қажет етеді. Дамыған шетел мемлекеттерінің әскери-техникалық құралдарын жасау әскери бюджеттің 30%-ын құрайды. Қ.қ. процесі қолданбалы ғылыми зерттеулерді, тәжірибелік-конструкторлық жұмыстарды, қару-жарақ пен әскери техниканы өңдеуді және пайдалануды қамтитын бағдарламалар бойынша жоспарланып жүзеге асырылады. Қ.қ. сериялы өндіруден басталады. Ескірген қару-жарақ пен әскери техниканы ауыстыру әскерлердің жауынгерлік дайындығын төмендетпей жүргізіледі.